shreesuryadoot@gmail.com
ઔડા રિંગ રોડ પરના સર્વિસ રોડનું 15 વર્ષ સુધી મેન્ટેનન્સ કરશે
સર્વિસ રોડ બે લેનનો બનાવાશે, પછી મ્યુનિ.ને સોંપવામાં આવશે
અમદાવાદની 76 કિમીની ફરતે આવેલા રિંગ રોડને ઔડા દ્વારા ફોર લેનમાંથી સિક્સલેન કરવામાં આવશે. જેના ભાગરૂપે મ્યુનિ.ની હદમાં આવતા 50 કિમીના સર્વિસ રોડને 15 વર્ષ માટે ઔડા હસ્તક લેવાની પ્રક્રિયા શરૂ કરાઈ છે. ઔડા બંને તરફના 50 કિમીના સર્વિસ રોડનો કબજો લઈને તેના મેન્ટેનન્સ અને રિડેવલપમેન્ટની કામગીરી કરશે.
રિંગ રોડના રિડેવલપમેન્ટની કામગીરી વખતે સર્વિસ રોડ પર લોકો માટે ડાઇવર્ઝન આપવામાં આવશે, જેને ધ્યાનમાં રાખીને સર્વિસ રોડ પરની આડસો અને દબાણો દૂર કરીને ઔડાને સોંપવામાં આવશે અને ત્યાર બાદ લોકો માટે સર્વિસ રોડ પરથી ડાઇવર્ઝન આપવામાં આવશે. રસ્તાનો કબજો લેવા માટે ઔડા દ્વારા પ્રક્રિયા શરૂ કરી દેવામાં આવી છે. ટૂંક સમયમાં આ અંગે નિર્ણય કરવામાં આવશે.
સરવે પ્રમાણે જ્યાં જરૂર પડશે ત્યાં એક લેનના સર્વિસ રોડને બે લેનનો પણ કરવામાં આવશે.ઔડા દ્વારા બે તબક્કામાં કામગીરી શરૂ કરવામાં આવશે. તેમાં અમદાવાદ પૂર્વ અને પશ્ચિમ બંને વાઇડનિંગ કામગીરી કરવામાં આવશે. ભવિષ્યમાં થનારા રોડ પરના ટ્રાફિકની સ્થિતિને ધ્યાનમાં રાખીને ઔડા દ્વારા રોડ વાઇડનિંગની કામગીરીને શરૂ કરવામાં આવી છે.
શરૂઆતમાં 15 વર્ષ સુધી રોડના રિડેવલપમેન્ટ અને મેન્ટેનન્સની કામગીરી ઔડા દ્વારા જ કરવામાં આવશે. ત્યાર બાદ આ રોડ અમદાવાદ મ્યુનિ.ને સોંપી દેવામાં આવશે. ઔડા અને રિંગ રોડ વાઇડનિંગની કામગીરી કરતી એજન્સીના સરવેમાં જાણવા મળ્યું છે કે, દરરોજ રિંગ રોડ પરથી 3 લાખથી વધુ વાહનો અવરજવર કરતાં હોય છે, જેના કારણે ઘણી જગ્યાએ ટ્રાફિક જામની સ્થિતિ સર્જાતી હોય છે. તમામ જગ્યાઓનો સરવે કરીને ટ્રાફિક જામને રોકવા માટે જરૂર પડશે ત્યાં ઓવરબ્રિજ અને અંડરપાસની કામગીરી શરૂ કરવામાં આવશે.
